وزارت امور خارجه اعلام کرد که هشتاد شهروند افغانستان که در تاجیکستان زندانی بودند، به افغانستان تحویل داده شدند تا بقیه دوران محکومیت خود را در کشور بگذرانند.
استرداد این زندانیان براساس موافقتنامه استرداد زندانیان میان افغانستان و تاجیکستان انجام می‌شود.
در خبرنامه وزارت امور خارجه که دیروز (یکشنبه، ششم اسد) منتشر شد آمده که صلاح‌الدین ربانی، وزیر خارجه افغانستان، چندی قبل در دیدار با امام علی رحمان، رئیس جمهور تاجیکستان از او خواستار اجرایی شدن این موافقتنامه شده بود.
صبغت احمدی، سخنگوی این وزارت گفته که براساس توافق دو کشور، زندانیانی به افغانستان منتقل می‌شوند که دادگاه تاجیکستان درباره آنان حکم کرده و از طرف دیگر زندانی نیز در استردادش به افغانستان رضایت داشته باشد.
آقای احمدی آماری از زندانیان افغان در تاجیکستان ارایه نکرد. او اما افزود که شماری از اتباع تاجیکستان در افغانستان زندانی هستند.
علاوه بر تاجیکستان، ایران و افغانستان نیز موافقتنامه‌ای را در سال ۱۳۸۵امضا کردند که بر اساس آن، زندانیان دو کشور برای سپری کردن مدت حبس باقی مانده به کشورهای خودشان منتقل می‌شوند.
برنامه تبادل زندانیان میان ایران و افغانستان از حدود پنج سال پیش آغاز شده است.