یک مقام بلندپایه تاجیکستان روز جمعه گفت که کشورش برای جا دادن به حداکثر ۱۰۰ هزار مهاجر از افغانستان آمادگی می‌گیرد. نگرانی از این است که با پیشروی طالبان و تشدید جنگ افغان‌ها به صورت گسترده به کشورهای همسایه مهاجرت کنند.
پیشروی شورشیان طالبان ادامه دارد و آن‌ها پیوسته مناطق بیشتری را تصرف می‌کنند. براساس برآورد پنتاگون، طالبان تا به حال کنترول بیش از نیمی از مراکز ولسوالی‌های افغانستان را به دست گرفته اند.
امام علی ابراهیم زاده، معاون رئیس کمیته امور اضطراری تاجیکستان، روز جمعه در یک کنفرانس خبری گفت که کشورش در حال احداث دو انبار بزرگ برای ذخیره تدارکات است تا به مهاجرانی که از افغانستانبه ولایت‌ ختلان و ولایت کوهستانی بدخشان تاجیکستان فرار می‌کنند، رسیدگی شود. دو ولایت نامبرده تاجیکستان با افغانستان هم مرز هستند.
در هفته‌های اخیر بیش از یک هزار تن از اعضای نیروهای امنیتی افغانستان و همچنین صدها غیرنظامی به دلیل حملات طالبان به تاجیکستان فرار کردند. اما حکومت دوشنبه می‌گوید که آن‌ها به افغانستان بازگردانده شده اند.